Spread the love

ஜனவர் 3, 2020

சொலைமானி இல்லாமலிருந்திருந்தால் இன்று மத்திய கிழக்கு முழுவதும் ஐசிஸ் கறுப்புக் கொடிகள் பறந்திருக்கும்

ஈரான் பல்கலைக் கழகத்தின் அமெரிக்கக் கற்கையின் தலைவர் மஹாமெட் மராண்டி.

ஈரானின் புரட்சிக் காவலர் என அழைக்கப்படும் அந் நாட்டின் இராணுவத்தின் வெளிநாட்டு நடவடிக்கைகளுக்குப் பொறுப்பான ஜெனெரல் கசிம் சொலைமானி உட்பட, ஆறு பேர், ஈராக்கில் அமெரிக்கப் படைகள் பாக்தாத் சர்வதேச விமான நிலையத்தின் மேற்கொண்ட வான் தாக்குதலின் போது கொல்லப்பட்டார்கள்.

மத்திய கிழக்கு | ஈரான் இராணுவத் தளபதி சொலைமானி அமெரிக்க குண்டு வீச்சில் பலி 1
ஈரானிய மதத் தலைவர் அயத்தொல்லா கமேனியுடன் கசிம் சொலைமானி

‘கட்ஸ் ஃபோர்ஸ்’ எனப்படும் வெளிநாடுகளில் இராணுவ நடவடிக்கைகளை மேற்கொள்ளும் ஈரானிய இராணுவத்தின் பிரிவிற்குத் தலைமை தாங்கிவந்த சொலைமானி சிரியாவிலும், ஈராக்கிலும் பெரும் பங்காற்றி வந்தவர். மத்திய கிழக்கில் ஈரானின் ஆதிக்கம் பரவுவதற்கு இவர் தான் பாத்திரவாளி எனக் கூறி இவரைக் கொல்வதற்கு அமெரிக்க, சவூதி அரேபியா, இஸ்ரேல் ஆகிய நாடுகள் கடந்த 20 வருடங்களாக முயற்சித்து வந்திருந்தன.

ஈரானின் எல்லைகளைக் கடந்து தாக்குதல்களை நடத்தும் கட்ஸ் ஃபோர்ஸ் என்னும் படையை இவர் வழிநடத்தி வந்தார். 2011 இல் சிரியாவில் ஜனாதிபதி பஷார் அல்-அஷாட் தோற்கடிக்கப்படும் நிலையில் இருந்தபோது அவருக்கு உதவியை வழங்கி அவரது ஆட்சியைக் காப்பாற்றினார். ஐசிஸ் பயங்கரவாதக் குழுவினை முறியடித்ததிலும் இவருக்கு மிகப் பெரிய பங்குண்டு.

சொலைமானி 1998 இல் இப் பதவிக்கு வந்திருந்தாலும், அவர் தன் இருப்பை அதிகம் முக்கியப்படுத்தவில்லை. லெபனானில் இருக்கும் ஹெஸ்பொல்லா, சிரியா, ஈராக்கிலுள்ள ஷியா துணைக்குழுக்கள் ஆகியவற்றுடன் நெருங்கிய உறவை ஏற்படுத்தினார்.

சமீப காலங்களில் அவர் ஈரானின் மதத் தலைவர் அயத்தொல்லா அலி கமேனியுடனநும் இதர ஷியா தலைவர்களுடனும் வெளிப்படத் தொடங்கியிருந்தார்.

இவரது தலைமையில், ஈரானின் புரட்சிக் காவலர் படை ஈரானுக்கு வெளியிலும் உளவு, நிதி, அரசியல் போன்ற விடயங்களில் செல்வாக்குச் செலுத்திவந்திருந்தது.

சொலைமானி, ஈரானின் கேர்மான் மாகாணத்திலுள்ள ஒரு வறிய குடும்பத்திலிருந்து வந்தவர். 13 வயதில் உழைத்துக் குடும்பத்தைக் காப்பாற்றியவர். 1979 இல் ஈரானியப் புரட்சியின்போது இராணுவத்தில் சேர்ந்து ஆறு வாரப் பயிற்சியுடன் போர்க்களம் சென்றவர். ஈரான் – ஈராக் போரில் இவர் மேர்கொண்ட சாகசங்கள் இவரது புகழை உலகெங்கும் பரப்பின.

2005 இல், போருக்குப் பின்னான புதிய ஆட்சியில் ஈராக் அரசியலில் சொலைமானியின் ஆதிக்கம் அதிகரித்தது. ஈராக்கில் ஷியா குலத்தினர் அதிகமாக இருப்பினும் சதாம் ஹுசேன் போன்ற சுனி குலத்தவரே ஆட்சியில் இருந்தனர். 2005 இற்குப் பிறகு சொலைமான் போன்றவர்களின் முயற்சியால் அங்கு மீண்டும் ஷியா குல ஆட்சி தலையெடுத்தது. சதாம் ஹுசேனின் முன்னாள் சுனி குல இராணுவமே பின்னர் ஐசிஸ் ஆக வடிவெடுத்தது.

2011 இல் சிரியாவில் போர் தொடங்கியபோது, சொலைமானியின் கட்டுப்பாட்டில் ஈராக்கில் இருந்த துணைப்படைகளை அவர் சிரியாவுக்கு அனுப்பி அசாட் ஆட்சியைக் காப்பாற்றினார். ஈராக்கிலுள்ள ஐசிஸ் படைகளை ஒழிக்க அவரது தலைமையின் கீழ் இயங்கிய ஈராக் ஷியா துணைப்படைகள் பெருமுதவி செய்தன.

சொலைமானி இல்லாமலிருந்திருந்தால் இன்று மத்திய கிழக்கு முழுவதும் ஐசிஸ் இன் கறுப்புக் கொடிகள் பறந்திருக்கும் என்கிறார் ஈரான் பல்கலைக் கழகத்தின் அமெரிக்கக் கற்கையின் தலைவர் மஹாமெட் மராண்டி.

Print Friendly, PDF & Email