World

‘பிறெக்சிட்’ | ஜோன்சன் – ஐ.ஒன்றியம் உடன்படலாம்?

ஐரோப்பிய ஒன்றியத்துடன் ஜோன்சன் சமரசம்

அக்டோபர் 15, 2019

பிரித்தானிய பிரதமர் போறிஸ் ஜோன்சன்

பிறெக்சிட் இழுபறி ஒருவாறு முடிவுக்கு வரும்போலிருக்கிறது. அயர்லாந்து எல்லை, சுங்கத் தீர்வை விடயங்களில் முடிவு எட்டமுடியாமல் இதுவரை இழுபறியிலிருந்த பிறெக்சிட் பிரதமர் ஜோன்சனின் பல விட்டுக்கொடுப்புகளின் பின்னர் ஒரு சுமுகமான நிலையை எட்டியிருக்கிறது.

பிரதமர் அலுவலகத்துக்கும் ஐரோப்பிய ஒன்றியத்துக்கிமிடையில் செய்யப்பட்ட ஒப்பந்தத்தின் வரைவு புதனன்று வெளியிடப்படலாமென எதிர்பார்க்கப்படுகிறது.

ஐரிஷ் கடலை சுங்க எல்லையாக ஏற்றுக்கொள்ளப்பட வேண்டுமென்ற ஐரோப்பிய ஒன்றியத்தின் வேண்டுகோளை முன்னாள் பிரதமர் தெரேசா மே நிராகரித்திருந்தார். “எந்தவொரு பிரித்தானிய பிரதமரும் அதை ஏற்றுக்கொள்ளப் போவதில்லை” என அவர் அப்போது கூறியிருந்தார். தற்போது பிரதமர் ஜோன்சன் இவ் விடயத்தில் ஐரோப்பிய ஒன்றியத்தின் கோரிக்கைக்கு விட்டுக்கொடுத்துள்ளார் எனத் தெரிய வருகிறது.

வட அயர்லாந்து தொடர்ந்தும் பிரித்தாநிய சுங்க எல்லைக்குள் இருக்கவேண்டுமென்பதே பிறெகக்சிட் கடும் போக்காளரது பிடிவாதமாக இருக்கிறது. குறிப்பாக, ஜனநாயக இணைப்புக் கட்சி (Democratic Unionist Party (DUP)) மற்றும் ஐரோப்பிய ஆய்வுக் குழு (European Research Group) ஆகியன இவ்விடயத்தில் சமரசம் செய்ய மறுத்திருந்தன.

கடும்போக்காளரின் ஆலோசனையின்படி, வட அயர்லாந்து சுங்கத் தேவைகளுக்காக பிரித்தானியாவுடனும் இதர அரசியல், பாதுகாப்பு விடயங்களுக்காக அது ஐரோப்பிய ஒன்றியத்துடனும் இருக்கலாம் என ஒப்பந்தம் செய்யப்படவேண்டுமென எதிர்பார்க்கப்பட்டது. ஆனால் ஐரோப்பிய ஒன்றியம் இதற்கு இணங்க மறுத்ததனால் சுங்க எல்லையை வட அயர்லாந்துக்கு வெளியே, ஐரிஷ் கடலில் இருக்கக்கூடியதாகச் சமரசமொன்றுக்கு ஜோன்சன் இணங்கியிருப்பதாகச் செய்திகள் கசிந்துள்ளன. நாளி (புதன்) பிரதமர் அலுவலகம் இது பற்றிய அறிக்கையொன்றை வெளியிடலாம் என எதிர்பார்க்கப்படுகிறது.