Spread the love


வெளிநாட்டுப் பணியாளர்களை, 70 இலிருந்து 30% மாகக் குறைக்க அரசு தீர்மானம்

குவைத் ஜூலை 06, 2020: குவைத்தில் தங்கிப் பணிபுரியும் இந்தியர்களின் எண்ணிக்கையைக் குறைக்க அந்நாட்டின் தேசிய சபையில் சட்டமூலமொன்று நிறைவேற்றப்பட்டுள்ளது. இது சட்டமாகும் பட்சத்தில் அங்கு பணிபுரியும் 8 இலட்சம் இந்தியர்கள் திருப்பி அனுப்பப்படும் சாத்தியம் உள்ளது.

கோவிட்–19 இற்குப் பின்னரான உலக மீளொழுங்கில் பெரும்பான்மையான நாடுகள், மனித வளமுட்படச் சுய மூலவளங்களில் தங்கியிருத்தலுக்கான நகர்வுகளை ஆரம்பித்து வருகின்றன. குவைத் நாட்டின் சனத்தொகையில் 70% வெளிநாட்டவர்; பணியாட்களில் 84% வெளிநாட்டவர்; தனியார் துறைப் பணியாளரில் 94% வெளிநாட்டவர். இவர்களில் பெரும்பாலோர் கடைகளிலும், வீட்டு வேலைக்காரர்களாகவும் பணி புரிகிறார்கள். 2019 இல் இந்திய வெளியுறவுத்துறை அறிக்கையின்படி 960,000 இந்தியர்கள் இங்கு பணி புரிகிறார்கள். 2017 தரவின்படி வருடமொன்றுக்கு US$ 4.68 பில்லியன் பணம் இங்கு வாழும் இந்தியர்களால் அனுப்பப்படுகிறது.



முன்மொழியப்பட்ட இச் சட்டமூலத்தின்படி, குவைத் நாட்டின் சனத்தொகையின் 15% த்துக்கு, இந்தியர்களின் எண்ணிக்கையைக் குறைப்பதற்கு தீர்மானிக்கப்பட்டுள்ளதாகத் தெரிகிறது. குவைத்தின் வெளிநாட்டார் சனத்தொகையை 30% த்துக்கு குறைக்கவேண்டுமென அந்நாட்டின் பிரதமர் இந்த மாதம் தெரிவித்திருந்ததற்கு அமைய இம் மாற்றங்கள் முன்மொழியப்பட்டுள்ளன.

கோவிட்-19 நோய்ப்பரவல் ஆரம்பித்ததன் பின்னர் குவைத்தில் வெளிநாட்டவருக்கு எதிரான குரல்கள் அதிகரித்து வருகின்றன.

ஜோன் ஹொப்கின்ஸ் பல்கலைக்கழகத் தரவுகளின்படி, குவைத்தில் 49,000 கொறோணாவைரஸ் தொற்றுக்கள் உறுதிப்படுத்தப்பட்டுள்ளன. அந்நாட்டின் 4.8 மில்லியன் சனத்தொகையில், 3.4 மில்லியன் வெளிநாட்டார் என உள்நாட்டுச் செய்தி ஸ்தாபனங்கள் தெரிவிக்கின்றன.

Print Friendly, PDF & Email
Related:  அமெரிக்க-சீன பலப்பரீட்சை | செங்டுவிலுள்ள துணைத் தூதரகத்தை மூடும்படி சீனா உத்தரவு!