கனடிய தேர்தல் |’தலைப்பாகையை வெட்டிவிடு’-மொன்றியலில் ஜக்மீட் சிங் எதிர்கொண்ட வாக்காளர்

Spread the love

அக்டோபர் 2, 2019

மொன்றியல் தெருவில் வாக்காளரை எதிர்கொள்ளும் புதிய ஜனநாயகக் கட்சியின் தலைவர் ஜக்மீட் சிங் (படம்: CBC)

அக்டோபர் 21 இல் நடைபெறவிருக்கும் கனடிய பொதுத் தேர்தலை முன்னிட்டு கனடிய புதிய ஜனநாயகக் கட்சியின் தலைவர் ஜக்மீட் சிங் கியூபெக் மாகாணத்தில் இன்று தனது பிரச்சார வேலைகளை மேற்கொண்டார்.

மொன்றியால் நகரில் அவர் தெருவில் மக்களைச் சந்தித்து அளவளவியபோது ஒரு வெள்ளை இனத்தவர் சிங்கை அணுகி அவரது கைகளைக் குலுக்கிவிட்டு, ‘ தலைப்பாகையை வெட்டிவிட்டாயானால் நீ கனடியன் மாதிரி இருப்பாய்’ என ஆலோசனை கூறினார்.

சிங் அந்த வாக்காளரை எதிர்கொண்டு பதிலளித்த விதம் கனடா முழுவதும் அவர் மீதான மதிப்பை அதிகரித்திருக்கிறது.

“ஓ, கனடியர் பலவித தோற்றங்களில் இருக்கிறார்கள் என நான் நினைக்கிறேன். அது தான் கனடாவின் அழகு” என சிங் பதிலளித்தார்.

“அது சரி, நான் ஒத்துக்கொள்கிறேன் ஆனால் ரோமாபுரியில் இருக்கும்போது நீ ரோமானியர்கள் போல் இருக்கவேண்டும்” என அந்த வாக்காளர் பதிலுக்குக் கூறினார்.

“இது கனடா. நீ விரும்பிய எதையும் செய்து கொள்ளலாம்’ எனக் கூறியவாறு சிங் தனது பிரச்சாரத்தைத் தொடர்ந்தார்.

“சரி, நன்றாக இரு. நீ வெற்றி பெறுவாய் என நான் நம்புகிறேன்” என அம் மனிதர் பதிலுக்குக் கூறினார்.

இன்றிரவு நடைபெறும் தொலைக்காட்சியொன்றில் நடைபெறவிருக்கும் பிரஞ்சு மொழியிலான, இதர கட்சித் தலைவர்களின் விவாதத்தில் கலந்து கொள்ள சிங் கியூபெக் மாகாணத்திற்கு வந்திருந்தார்.

கியூபெக் மாகாணம் சமீபத்தில் அறிமுகப்படுத்தியிருக்கும் பிரச்சினைக்குரிய சட்டமூலம் (Bill 21) அம் மாகாணத்தில் வாழும் இனக்குழுமங்களிடையே பலத்த விவாதங்களை எழுப்பி வருகிறது.

மாகாணத்தின் பொதுப்பணிகளில் (அரச உத்தியோகங்கள்) பணியாற்றுபவர்கள் கடமை நேரத்தில் மத அடையாளங்களை அணியக் கூடாது என்ற சட்டத்தை மாகாணப் பாராளுமன்றம் சமீபத்தில் அறிமுகப்படுத்தியிருந்தது.

மத அடையாளமான தலைப் பாகையுடன் சிங் தலைவர்கள் விவாதத்தில் கலந்து கொண்டு கியூபெக்கின் மத அடையாளச் சட்டம் பற்றி விவாதிப்பதுவும் ஒருவகையில் விவாதத்தைச் சுவாரசியமாக்கும் என எதிர்பார்க்கப்படுகிறது.

ஒரு மத்திய அரசியல் கட்சியின் தலைவராக ஒரு வெள்ளையரல்லாத சிறுபான்மை இனத்தவர் கனடிய அரசியலில் போட்டியிடுவது இதுவே முதல் தடவையாகும்.

லிபரல் கட்சியின் தலைவர் ஜஸ்டின் ட்ரூடோ, கன்சர்வேட்டிவ் கட்சியின் தலைவர் அண்ட்ரூ ஷியர், புளொக் கியூபெக்குவா கட்சியின் தலைவர் ஈவ்-பிரான்சுவா பிளான்ஷே ஆகியோரும் பிரன்ச்சு மொழியிலான இவ் விவாதத்தில் கலந்து கொள்கிறார்கள்.

கியூபெக் மாகாணத்தில் இன்று ‘நனோஸ்’ நிறுவனத்தால் எடுக்கப்பட்ட கருத்துக் கணிப்பொன்றில் லிபரல் கட்சி முதலாவது இடத்திலும், புதிய ஜனநாயகக் கட்சி நான்காவது இடத்திலும் இருக்கிறது.

பாராளுமன்றத்தில், ஒன்ராறியோவிற்கு (121) அடுத்தபடியாக கியூபெக் மாகாணம் 78 ஆசனங்களைக் கொண்டிருக்கிறது. ஒன்ராறியோவிலும் கியூபெக்கிலும் அதிகளவு ஆசனங்களைப் பெறும் கட்சியே ஆடிசியமைக்கும் வழக்கமுண்டு. அந்த வகையில் கியூபெக் விவாதம் தலைவர்கள் மத்தியில் முக்கியமான ஒன்றாகக் கருதப்படுகிறது.

சிங்கின் தலைமையில் புதிய ஜனநாயக்கட்சி நாடு தழுவிய ரீதியில் பாரிய சவால்களை எதிர்கொள்ள வேண்டி இருக்கிறது. நிதி சேகரிப்பு முதல் வேட்பாளர்களை நியமிப்பதுவரை சிங்கின் பயணம் இதுவரையில் இலகுவாக இருப்பதாகத் தெரியவில்லை.

Print Friendly, PDF & Email
>/center>