US & Canada

ஒட்டாவா நகரில் குடும்பம் குத்திக் கொலை

கனடாவின் தலைநகரான ஒட்டாவில் வசித்து வந்த நான்கு பிள்ளைகளுடனான குடும்பமொன்றை சந்தேகநபர் கத்தியால் குத்தியதால் தாயும் நான்கு பிள்ளைகளும் கொல்லப்ப்ட்டுள்ளனர் எனவும் தந்தையார் மருத்துவமனையில் சிகிச்சை பெற்று வருவதாகவும் அறியப்படுகிறது. இச்சம்பவத்தின் போது மேலுமொருவர் கொல்லப்பட்டுள்ளதாகவும் அவரும் இவ்வீட்டில் வாடகைக் குடியிருப்பாளராக இருந்திருக்கலாம் என ஊகிக்கப்படுகிறது.

ஒட்டாவா புற நகர்ப்பகுதியிலுள்ள பார்ஹேவென் என்னுமிடத்திலுள்ள பெரிகன் ட்றைவ் வீதியிலுள்ள வீடொன்றில் புதன் இரவு (மார்ச் 06) பத்தரை மணிபோல் நடைபெற்ற இச்சமபவத்தின் போது கொல்லப்பட்டவர்களில் 5 பேரை பொலிசார் அடையாளம் கண்டுள்ளனர். அவர்கள்:

  • தர்ஷனி பண்டாரநாயக்கா / ஏகநாயக்க (மனைவி – 35 வயது)
  • இனுக்கா விக்கிரமசிங்க (மகன் 7 வயது)
  • அஷ்வினி விக்கிரமசிங்க (மகள் 4 வயது)
  • றினாயனா விக்கிரமசிங்க (மகள் 2 வயது)
  • கெலி விக்கிரமசிங்க (மகள் 2 மாதம்)

கணவன் தனுஷ்கா விக்கிரமசிங்க (மதுரங்கா) உயிர் தப்பியிருந்தும் கை விரல்கள் மற்றும் ஒரு கண்ணில் காயங்களுண்டாகி மருத்துவமனையில் சிகிச்சை பெற்று வருவதாக அறியப்படுகிறது. குடும்ப நண்பரான 40 வயதுடைய அமரக்கூன் முபியயான்செல (காமினி) என்பவரும் இச்சமபவத்தின்போது கத்திக்குத்துக்கு உள்ளாகி மரணமடைந்திருக்கிறார்.

19 வயதுடைய ஃபப்றியோ டி சொய்சா என்னும் பெயருடைய வாலிபர் இந்த ஆறு கொலைகளினதும் முதற்தர கொலைச் சந்தேகநபராகக் கருதப்பட்டு கைதுசெய்யப்பட்டுள்ளார். இவர் கனடாவிற்கு கல்வி கற்பதற்கான விசாவில் சமீபத்தில் வந்திருக்கலாமெனப் பொலிசார் சந்தேகிக்கின்றனர். இவரும் காமினி அமரக்கோனும் அதே வீட்டில் வசித்து வந்தார்கள் எனக் கூறப்படுகிறது. சமபவம் நடைபெற்று சில நிமிடங்களில் டி சொய்சா ஒட்டாவா நகர் மத்தியில் வைத்து கைது செய்யப்பட்டுள்ளார்.

இக்குடும்பம் வெவ்வேறு காலங்களில் கனடாவுக்கு வந்தவர்கள் எனவும் கடைக் குழந்தை கனடாவில் பிறந்தவரெனவும் தெரியவருகிறது. சம்பவம் நடைபெற்ற வீடு இக்குடும்பத்திற்குச் சொந்தமானதெனவும் 2013 இலிருந்து இவ்வீடு அவர்களுக்குச் சொந்தமாக இருக்கிறதெனவும் வீட்டு பதிவுகள் மூலம் அறியக்கூடியதாக இருக்கிறது.