Spread the love

இந்திய ‘மும்மொழித் திட்டத்திற்கு’ தெரிவித்த கடும் எதிர்ப்பைத் தொடர்ந்து அனைத்து மத்திய அரச அலுவலகங்களிலும் தமிழ் உத்தியோக மொழியாக ஆக்கப்பட வேண்டுமென தி.மு.க. தலைவர் மு.க.ஸ்டாலின் வற்புறுத்தியிருக்கிறார்.

மறைந்த இந்திய யூனியன் முஸ்லீம் லீக்கின் தலைவர் காயிதே மில்லத் அவர்களின் 124வது பிறந்த நாளை முன்னிட்டு நடந்த வைபவத்தில் அவர்களுக்கு மரியாதை செலுத்திவிட்டு ஊடகவியலாளர்களுடன் பேசும்போது “சகல மத்திய அரச அலுவலகங்களிலும் தமிழ் உத்தியோக மொழியாக்கப்பட வேண்டும் என்பதாக இன்றய நாளில் நாம் உறுதி மொழி எடுத்துக் கொள்வோம்” என்றார் திரு. ஸ்டாலின்.

தமிழக சட்ட சபையில் எதிர்க்கட்சித் தலைவராக இருக்கும் திரு. ஸ்டாலின் ‘மத்திய அரசு , மூன்று மொழித் திடடத்தின் மூலம் இந்தியைத் திணிக்க எடுத்த முயற்சி தமிழர்களின் கடும் எதிர்ப்பால் கைவிடப்பட்டுள்ளது’ எனத் தெரிவித்தார். திரு C .N .அண்ணாத்துரை அவர்களால் முன்வைக்கப்பட்ட ‘இரு மொழி’ க் கொள்கையே நாடு முழுவதும் நடைமுறைப் படுத்தப்பட வேண்டும் என அவர் மேலும் தெரிவித்தார்.

தேசியக் கல்விக் கொள்கை என்ற மும் மொழித் திட்ட வரைவு அறிவிக்கப்பட்ட மறுநாளே இந்தி பேசாத மாநிலங்களின் கடும் எதிர்ப்புக் காரணமாக மத்திய அரசு அவ் வரைவை மீளப் பெற்றிருந்தது. தமிழ் நாட்டில் தி.மு.க. வுடன் ஏனைய கட்சிகளும் இத் திட்டத்திற்குப் பலத்த எதிர்ப்பைத் தெரிவித்திருந்தன.

தமிழ் நாட்டில் 1967ல் அறிஞர் அண்ணாத்துரை தலைமையில் தி.மு.க. ஆட்சியைக் கைப்பற்றியதன் பின்னர் 1968 இல் தமிழும் ஆங்கிலமும் என்ற இரு மொழிக் கொள்கை நடைமுறையில் இருந்துவருகிறது.

Print Friendly, PDF & Email
Related:  மும்மொழித் திட்டத்தைத் தமிழ்நாடு ஏற்றுக்கொள்ளாது - முதலமைச்சர் எடப்பாடி உறுதி